توانائی اور روزگار کی فراہمی ہماری ترجیحات میں شامل ہونی چاہئیں، زرداری

اسلام آباد ۔۔۔۔۔صدر مملکت آصف علی زرداری نے کہا ہے کہ گلگت بلتستان کے عوام کی جرات، قربانیاں اور پاکستان سے الحاق کا فیصلہ ہماری مشترکہ تاریخ کا اہم حصہ ہیں، جبکہ اس خطے کے عوام کو بہتر سڑکوں، اسکولوں، صحت کی سہولیات، توانائی اور روزگار کی فراہمی ہماری ترجیحات میں شامل ہونی چاہئیں۔صدر مملکت نے گلگت بلتستان کے 79ویں یوم آزادی پر پیغام میں علاقے کے عوام کو مبارکباد پیش کرتے ہوئے ڈوگرہ راج کے خلاف تاریخی جدوجہد میں حصہ لینے والوں کو خراج تحسین پیش کیا۔ انہوں نے کہا کہ 79 سال قبل گلگت بلتستان کے عوام نے ڈوگرہ راج کا خاتمہ کرکے آزادی کا اعلان کیا اور اس کے بعد قائداعظم محمد علی جناحؒ کو پاکستان سے الحاق کےلئے خط ارسال کیا۔صدر مملکت نے کہا کہ شہید ذوالفقار علی بھٹو نے 1972 میں گلگت بلتستان میں اصلاحات کا آغاز کیا، جس کے تحت ایف سی آر اور جاگیرداری نظام ختم کیا گیا اور انتظامی و عدالتی ڈھانچے میں تبدیلیاں متعارف کرائی گئیں۔ 1974 میں ہنزہ اور نگر سمیت دیگر ریاستوں کو ختم کرکے انتظامی نظام کو مزید مربوط بنایا گیا۔ بعد ازاں شہید محترمہ بے نظیر بھٹو نے 1994 کے لیگل فریم ورک آرڈر کے ذریعے اصلاحات کا عمل آگے بڑھایا، جبکہ 2009 میں پیپلز پارٹی کی حکومت کے دور میں گلگت بلتستان کو بااختیار بنانے اور خود حکمرانی کا آرڈر متعارف کرایا گیا۔انہوں نے کہا کہ چین کے ساتھ براہ راست سرحد، قدرتی وسائل اور تزویراتی محل وقوع کے باعث گلگت بلتستان غیرمعمولی اہمیت رکھتا ہے۔ عام خاندانوں کی ترقی کےلئے معیاری اسکولوں، اسپتالوں، نوجوانوں کے لیے روزگار اور کسانوں و چھوٹے کاروباروں کے لیے منڈیوں تک رسائی ضروری ہے۔ انہوں نے کہا کہ علاقے کے پہاڑ، گلیشیئرز، دریا اور ثقافتی ورثہ قومی اثاثہ ہیں، سیاحت کے فروغ کے ساتھ قدرتی ماحول کا تحفظ بھی یقینی بنایا جانا چاہیے۔